Dear Atty. V,

Tawga lang ko sa ngalang Jason. Usa ko ka security guard apan walay lisensya. Pwede ba nako makasohan ang agency nako sa una nga tulo ko ka tuig apan wala sa minimum ang akong sweldo og 12 hours akong duty?Wala ko kaagwanta mi-resign na lang ko. Ang akong cash bond PHP 200.00 kada bulan ang deduction ug ang akong pondo 10 days hangtod karon wala pa nila gihatag pwede bah nako ireklamo Atty. V? Salamat.

*****

Dear Jason,

Ang atong minimum wage sa Metro Cebu alang sa non-agricultural work PHP 404.00 na sugod niadtong Enero 4, 2020. Mahimo mong ireklamo ang imong previous employer aron makakolekta ka sa diperensya sa minimum wage ug sa actual nga gisweldo sa imo.

May overtime premium usab kon molapas ka og walo ka oras matag adlaw.

Ang cash bond ug unpaid wages imoha na kini og busa makolekta mo usab.

Dalia kining imong reklamo kay ang ma-recover nimo ang imo lamang money claims sa miaging tulo ka tuig sa pagpasaka sa reklamo sa Regional Arbitration Branch. Sa ato pa kon ipasaka nimo ang kaso Biyernes, Enero 15, 2021, ang mga money claims mo lamang sa Enero 15, 2018 ug human niini ang makolekta nimo.

Hinaot nakatabang kini kanimo.

– Atty. V

(Note: This was an article for Brigada Balaod, a column I had with the Brigada Newspaper Visayas Edition from September 2019 to August 2022.)