Dear Atty. V,

Ako si Reggie, angga na nako. Ang akong problema ang akong ngalan sa birth certificate kay REGIDOR unya ang akong baptismal certificate kay REGINO. Sukad sa pag-eskwela hangtod pagtrabaho, pagbotar, tanan record lakip na sa Social Security System o SSS, REGIDOR ang akong gigamit. By the way single pa ko karon, 47 years old. Ingon nila kon magminyo ko o simbako palayo mamatay ang pangitaon sa simbahan, baptismal certificate. Unsa may akong buhaton gusto unta ko nga ang ngalang REGIDOR sa birth certificate ang ako gamiton sa baptismal certificate kon pangitaan ko sa simbahan.

******

Dear Reggie/Regidor/Regino,

Tungod sa church-state separation nga nalatid sa atong Batakang Balaod, nga pinasubay pa sa una nga ang Amerikano ang nagdumala kanato, ang atong kagamhanan dili manginlabot sa mga proseso sa simbahan. Sa ato pa, ang atong balaod walay labot sa unsay paagi sa simbahan nga ang imong baptismal certificate mabalhin ngadto sa REGIDOR gikan sa REGINO. Ang labing maayo mong buhaton, adtoon mo ang kura paroko sa simbahan diin ka gibunyagan aron mapangutana unsay proseso kon ingon ana nga sitwasyon.

Timan-i nga ang opisyal mo nga ngalan mao ang nabutang sa imong certificate of live birth. Sa atong sistema sa pamalaod, gitan-aw sa Estado nga may dako siyang pagkontrol sa mga ngalan, maong dili kita makadali-dali pag-usab sa atong ngalan nga nalatid diha sa certificate of live birth; kon kini dili simple clerical errors, gikinahanglan gayod nga moadto sa korte, ug dili usab sa tanang panahon tugtan kini.

Hinaot nakatabang kini kanimo.

– Atty. V

(Note: This was an article for Brigada Balaod, a column I had with the Brigada Newspaper Visayas Edition from September 2019 to August 2022.)