Usa sa mga progresibong balaodon nga gisang-at sa Kongreso karon mao ang House Bill No. 1144 sa Makabayan Bloc, pinangunahan ni Rep. Arlene D. Brosas sa Gabriela Women’s Party. Ang maong balaodon may katuyoan nga i-decriminalize ang Article 333 ug 334 sa Revised Penal Code (RPC).
Ang Article 333 sa RPC nag-criminalize sa adultery, kon ang pakighilawas sa babayeng minyo sa usa ka lalaki nga dili niya bana, o sa usa ka lalaki ngadto sa usa ka babayeng minyo nga dili niya asawa, ug nahibawo siya nga minyo ang babaye. Ang adultery may silot nga 2 ka tuig, 4 ka buwan ug usa ka adlaw hangtod 6 ka tuig nga pagkapriso.
Ang Article 334 usab nag-criminalize sa concubinage, nga mao ang pagpuyo og kabit sa lalaking minyo sulod sa pinuy-anan sa managtiayon, o pakighilawas sa babaye nga dili niya asawa sa eskandaloso nga paagi, o pakigpuyo sa kabit sa laing lugar. Ang lalaki silotan sa 6 ka buwan ug 1 ka adlaw ngadto sa 4 ka tuig ug 2 ka buwan nga pagkabilanggo, samtang ang babaye mandoan nga mobiya sa lugar (destierro).
Kining maong balaod unfair sa kababayen-an, kay samtang ang bana moprobar lamang nga nakighilawas ang iyang asawa sa laing lalaki, ang asawa gikinahanglan pa nga moprobar nga ang pakighilawas sa iyang bana nagdto sa laing babaye ubos sa eskandolosong mga sirkumstansya. Ug matod pa, ang kasilinganan mao ang angay nga maeskandalo. Gani, sa U.S. v. Campos Rueda, 35 Phil. 51, ang paggamit og mga espiya/imbestigador aron bantayan ang akusado, ug nga walay mga silingan nga naeskandalo sa gihimo sa akusado, nagpasabot nga walay ebidensya sa eskandalo. Usa pa, mas taas og silot ang adultery kay sa concubinage.
Kani man gong krimen sa adultery, gimugna sa panahon nga lisod pa kaayo pagdeterminar kinsa ang amahan sa bata nga gisabak sa usa ka babaye. Gani, dunay civil code provision nga ang bata nga gimabdos sa usa ka babayeng minyo, iya sa iyang bana, gawas kon iyang kwestiyonon. Ang katuyoan sa balaod sa una mao ang dili pagpasulod og spurious child sa kaminyoon, aron malikayan nga maadto sa dili kadugo ang kabtangan.
Apan sa karon nga dali na lamang kaayo ang mga condom ug contraceptive, ug ang pagpa-DNA test sa bata mag-ila na pod og kinsay amahan sa bata, tingali angay nang tan-awon kon usbon pa ning maong balaod.