Ang katungod nga atubangon ang testigo batok sa akusado makita sa Batakang Balaod. Ubos sa Section 14(2) sa Article III, “to meet the witnesses face to face” usa sa mga katungod sa usa ka akusado. Duha ang katuyoan niini: (1) aron mahatagag tsansa ang akusado nga i-test ang testimonya sa testigo pinaagi sa cross-examination; ug (2) aron makit-an sa huwes giunsa pagtubag sa testigo.
Apan niadtong October 9, 2019, mipagawas ang Supreme Court sa ilang desisyon sa People v. Maria Cristina P. Sergio and Julius L. Lacanilao, G.R. No. 240053, nga para kanako nag-usab ning maong katungod to confront witnesses against the accused.
Kining maong kasoha naggumikan sa pagkadakop ug pagka-apil sa death row ni Mary Jane Veloso didto sa Indonesia. Kahinumdoman, kini sila si Cristina Sergio ug Julius Lacanilao maoy gipasinganlang nagbutang og drugas sa bag ni Veloso, nga maoy hinungdan nga nahukman sa kamatayon si Veloso didto sa Indonesia. Gidakop sila sa National Bureau of Investigation ug gipasakaan og kaso. Apan si Veloso ra ang bugtong testigo ug tua sa Indonesia si Veloso, busa ang prosekusyon mi-move didto sa Regional Trial Court nga ang testimonya ni Veloso ipaagi sa written interrogatories, mga sinulat nga pangutana lamang nga pagatubagon ni Veloso. Mi-object ang kampo ni Sergio ug Lacanilao kay violation kini sa Rules of Court ug sa Section 14(2), Article III sa Konstitusyon. Gi-grant sa korte ang maong motion, busa misaka sa Court of Appeals sila si Sergio ug Lacanilao. Ang CA mibali sa RTC ug wala motugot sa written interrogatories. Maong miabot ang kaso sa Supreme Court.
Ang SC miingon sakto ang RTC. Matod pa, walay violation sa right to confront witnesses, kay maka-cross examine ra man gyapon ang mga akusado pinaagi sa written interrogatories. Unya, ang huwes adto pod sa pagpangutana kang Veloso.
Finally, miingon ang Supreme Court nga “dying declaration” ang ipanulti ni Veloso, kay nahibawo na siya nga hapit na siya mamatay. Sa akong pagkahibalo, kini ang labing unang higayon nga migamit ang SC sa “dying declaration” sa usa ka tawo nga wala pay fatal nga samad nga ikamatay niya sa mosunod nga pipila ka gutlo kon dili matambalan dayon.
Isip usa ka defense counsel, ang tan-aw nako aning kasoha, nagtibhang sa right to confront witnesses. Hinaot nga mausab ni sa umaabot, apan sa kasamtangan, kini mao ang balaod.