Niadtong imaging semana, misikat sa Facebook ang video sa di-makatawhanong pagsikop/pagpaurong sa usa ka ambulant vendor diin makitang naninguha intawon nga makuha og balik ang iyang baligya, apan gisige og duot-duot sa duha ka miyembro sa Prevention, Restoration, Order, Beautification, and Enhancement (PROBE) Team sa Dakbayan sa Sugbo, samtang ang laing miyembro sa PROBE mibira gayod sa iyang mga baligya.
Ang maong video mi-viral, ug gani si Cebu City Mayor Edgardo Labella mimando na sa Cebu City Legal Office paghimog imbestigasyon sa maong hitabo. Si PROBE OIC Raquel Arce mipagawas na pod og pahayag nga ang upat (matod pa, bisan kon sa video tulo ray makita) ka sakop sa PROBE “grounded” samtang ang kaso tan-awon sa Cebu City Legal Office.
Maayo nga lakang ang buot himoon ni Mayor Labella nga himoan og imbestigasyon ang maong hitabo. Apan dili tingali mourong ang dakbayan diha lamang sa administratibo nga kaso batok ning maong mga sakop sa PROBE.
Sumala sa makita sa video, klaro kaayong giduot-duot sa usa sa mga sako sa PROBE ang tindero ngadto sa sidewalk fence. Kon kining maong buhat, nga nakuha sa video, makitawhanon pa ug pinasubay pa sa balaod, ambot na lang kaha og unsa diay kahay di-makitawhanon ug kriminal ning nasora.
May pipila nga naninguha pag-justify sa maong gibuhat sa mga PROBE personnel tungod lagi kuno kay ang maong tindero kapila na nadakpan. Apan granted nga kapila na siya nadakpan, sakto kaha ang gihimo sa mga sakop sa PROBE?
Usa pa, unsa man gyoy problema nato sa mga ambulant vendors? Grabe na ba gyong kasamok nila sa dalan nga kinahanglan nato silang papahawaon? Dili kaha hinuon angay nga tabangan nato kining mga tawhana nga naninguha lang intawon, yawat nga makabuhi sa ilang kaugalingon ug sa ilang pamilya sa tinarong nga paagi?
Alang sa inyong mga pangutanang legal, mahimo kamong mo-text sa 0916-664-7624.