Niadtong Martes, Disyembre 10, 2019, gisaulog sa kalibotan ang International Human Rights Day isip paghinumdom sa pagpalabang sa United Nations sa Universal Declaration of Human Rights (UDHR) niadtong Disyembre 10, 1948.
Kahinumdoman niadtong panahona mao pa gyoy pagkahuman sa Second World War, kanus-a grabe ang pagpangabuso sa human rights.
Maong ang mga nasod sa kalibotan nagkasabot nga mopalabang og usa ka dokumento nga nag-outline sa minimum human rights sa matag tawo.
Dinhi sa Sugbo, gipahigayon didto sa Marco Polo Hotel ang kalihokan nga gipasiugdahan sa Task Force Detainees of the Philippines (TFD) ug kita ang napili nga mobatbat sa isyu kabahin sa inanayng pagkawala sa mga demokratikanhong katungod sa mga Pilipino.
Nahisgotan namo ang implikasyon ngadto sa mga human rights defenders sa pronouncement sa Presidente nga walay siyay panginlabot sa tawhanong katungod.
Nahisgotan usab ang padayong pagpangilog sa mga yuta sa lumad aron ipasulod ang mga mina.
Lakip sa diskusyon ang Executive Order No. 70 ni Pres. Rodrigo Duterte nga nag-institutionalize sa whole nation approach sa pagsumpo sa national insurgency.
May mitimang usab kabahin sa Securities and Exchange Commission (SEC) Memorandum Circular no. 15 nga nagmando sa tanang korporasyon (lakip mga non-governmental organizations kun NGO) sa pag-disclose sa ilang sources of funds.
Pagkagabii dunay socials ug mas gipalawman pa ang diskusyon sa pipila ka isyu.
Isip abogado, giila ko ang gahom sa balaod aron usbon ang mga hiwi sa atong sistema, apan isip human right defender, akong nakita nga duna pay daghang mahimong lakang gawas na lamang sa pagpangabogar aron mapauswag pa ang nasodnong paninguha alang sa tawhanong katungod. Dako na tuod kita og pag-ugmad, apan halayo pa ang katumanan sa mga labing ubos nga diwa – labi na gayod ang katungod sa kinabuhi, kagawasan ug kabtangan.
Kining atong lindog dinhi sa Brigada Newspaper usa ka paagi aron matabangan nato ang mga magbabasa – kay ang kahibalo sa balaod importanteng kabahin sa pagproteher sa atong katungod.
Alang sa inyong pangutanang legal, text sa 0916-664-7624.