Kagahapon sa kaadlawon nadugay kog uli gikan sa opisina kay nadugay-dugayan man pod kog biya didto sa balay sa usa ka konsehala. Alas dos kapin na sa kaadlawon dihang mibiya kos opisina.
Paglabang nako sa eskina Gorordo samtang nagdagan sa dalan Escario, aksidenting nasabod sa telescopic sa akong motor ang gipabarog nga “Two Way Traffic” nga signage sa taga Cebu City Traffic Office (CCTO). Isip tarong nga lungsoranon, ug kay wala man gyoy nakitang sayop sa akong nahimo (kay aksidente man gyod), mipadaplin ko sa unahan ug gibalik ang signage. Naunsa bang gipangayoan man hinuon kos akong lisensya sa CCTO personnel nga na-assign didto.
Nangutana ko og unsay akong violation. Dapat daw ko isyuhag TOP kay nag-reckless driving daw ko. Akong gipangutana kon nganong na-reckless driving ang ako dinrayban. Matod niya kay nasabod daw nako ang signage. Ako giingnan nga dili abi kay nasabod ang signage, awtomatik na nga reckless driving.
Ang definition sa reckless driving, pag-drive without due regard and care of the road circumstances. Dili abi kay duna kay nasabod o nadisgrasya automatic na nga reckless driving. Kinahanglan usa nga maklaro nga walay due regard ang nag-drive sa mga sirkumstansya.
Sa akong sitwasyon, niadto pang panahona gipamutang ang signages. Sigurado pod ko nga hinay ra ang akong dagan; ang numero unong ebidensya niana mao nga wa ko malamba sa motor ug naka-park og tarong sa unahan. (Nagpahinay kog dagan kay nag-warning na ang akong fuel indicator ug nahunahunaan nako nga labing duol nga pagasolinahan adto pa sa Banilad.)
Akong giingnan ang CCTO personnel nga wa may problema kon iya kong isyuhan og TOP (sa pagkatinuod wala ko kahibawo kon sakto ba nga TOP ang i-issue sa akoa ingon anang sitwasyona kay sa lima ka tuig nga pag-drive nako dinhi sa Metro Cebu wala pa gyod koy violation) pero i-contest gyod nako ang iyang desisyon. Ang akong pag-park sa unahan ug pagbalik sa agi (bisan nga pwede ra baya unta ko modiretso) timailhan nga wa koy intensyon nga molighot sa balaod kon duna man koy na-violate.
In the end, naka-realize siya nga wala koy violation. Iyang giuli ang akong lisensya. Mipasalamat ko ug mipadayon pagpauli.
Maayo unta og sa sunod nga mag-road o lane closures, magbutang gyod og pahibalo days before ang CCTO sa mga apektadong dalan. Gihimo baya kini sa una. Wala ko kakuha sa lohika sa CCTO personnel nga ako kunong sala kay wa ko makahibawo nga sige mang pahibalo sa media. Sa tinud-anay, gikan alas singko sa buntag (inig mata) hangtod mga alas siyete o otso (inig biya sa balay) ra ko makapaminaw sa radyo, ug sa Brigada News FM 93.1 ra sab. Walay TV sa akong balay diri sa Metro Cebu. Makapalit ko og Brigada Newspaper kon naa na ang suki nakong newstand inig agi nako. Mao ra nay local media consumption nako. Ug sa miaging mga adlaw wala gyod ko kabantay bahin niining mga road closure. In any case, unsa ba goy nakalisod sa pag-post diha duol sa mga dalan nga apektado mismo? Nahimo man lagi na sa una.
Laing punto nga kon kita mahiagom og ingon ani nga sitwasyon, mas maayo gyod nga ipasabot ngadto sa personnel nganong sakto ta sa atong perspektibo. Wa nuon ko makahibalo pilay multa anang reckless driving, pero kuti na pod kaayo if gidayon pa to. Maayo gali kay sa akong pagpasabot naka-realize siya nga walay reckless driving nga nahitabo.
Alang sa inyong mga pangutanang legal, text sa 0916-664-7624.