Ang joint venture agreement (JVA) usa ka klase sa kontrata diin ang duha o daghan pa ka mga partido nagkasabot nga ang matag usa may kontribusyon sa komon nga kalihokan o negosyo. Ang buot pasabot niini, ang matag partido co-investor sa negosyo, ug kon dunay alkanse, apil pod sa alkanse ang tanang partido. Kon dunay ginansya, apil pod ang tanan sa ginansya. Kon pilay share sa matag usa, depende sa sabot. Kon wala mabutang sa kontrata, presumed nga pro-rated: ang dakog kontribusyon, dakog share sa ginansya.
Ang porma sa JVA usa ka written contract. Preferably notarized kini, apan dili required nga notaryado. Hinuon, bisan pag notaryado, ang agreement private matter gihapon sa mga co-investors – walay labot ang outside world sa maong dokumento. Sa ato pa, kon ang mipirma sa kontrata let us say sa pag-utang og mga materyales dili mobayad, ang ikiha sa gikuhaan sa materyales kato lamang wala mobayad. Iya nang depensa sa wa mobayad nga dapat paapilon pod to sa pagbayad ang uban niyang kauban. Kon ang kontrata worded in such a way nga partnership gayod sila bisag wala marehistro sa Securities and Exchange Commission, modeklara ang korte nga liable usab ang ubang partners.
Mahimong tawo, kooperatiba, o korporasyon ang mga partido sa usa ka joint venture agreement. Wala gidili sa balaod nga lain-laing persons in contemplation of law ang mosulod og JVA.
Ang pipila mosulod ning JVA imbes nga mag-put up gyod og partnership o korporasyon tungod sa kakuti sa proseso sa pagpa-rehistro og partnership o korporasyon. Apan ubay-ubay pod ang dili makig-deal og mga JVA kay kon dunay problema mas lisod paggukod ang JVA kay sa registered partnership or corporation. Ultimately, depende ra gyod sa needs sa mga negosyante ang desisyon kon mag-JVA ba o dili, ug kon makig-deal ba o dili sa usa ka JVA.
Alang sa inyong mga pangutanang legal, text sa 0916-664-7624.