Dear Atty. V,
Taudtaod na kong nagtrabaho ning maong kompaniya, apan kanunay ming underwage. Dili saktong sweldo ang gihatag sa amo. Magsige lang og saad, unya usahay modangat pa og pila ka adlaw sa dili pa manweldo. Ang akong mga pangutana mao kini: (1) Asa man mi moduol aron mareklamo ni namo ang among amo? (2) Kon dili gyod sila mohatag og saktong sweldo, unsa may pwede namong buhaton? (3) Kanus-a man gyod mi sweldohan, kon subayon ang balaod?
Daghan kaayong salamat.
– George
Dear George,
Ang una ug ikaduha mong pangutana sama ra og tubag: adto kamo sa regional office sa Department of Labor and Employment (DOLE). Dinhi sa Sugbo, anaa mahimutang sa NLRC Bldg. sa may Gorordo Ave. ang opisina sa DOLE.
Ang mahitabo niini, padalhan ang inyong kompaniya/amo og imbitasyon, ug mag-atubang kamo didto sa DOLE. Kon magkasabot kamo, maayo. Apan kon dili, mohukom ang DOLE pila ang wage differentials nga angayng ihatag sa inyo kompaniya/amo.
Kon dili kini nila tumanon, may procedure ang DOLE pagpugos kanila.
Sa imong pangutana kabahin sa tukmang panahon kanus-a kamo sweldohan, ang giingon sa balaod nga dili mokubos sa kinsena ang pagpanweldo. Sa ato pa, kaduha magsweldo sa matag bulan.
Kon estriktohon gyod og sunod ang balaod, matag 15 ka adlaw, kinahanglan kang bayran sa imo nang natrabahoan. Hinuon, tungod pod sa panginahanglan sa acounting, usahay naa kining cut-off system. Pananglitan, sa sweldo nimo sa Sabado, hangtod lamang sa Huwebes, walay labot ang sa Biyernes ug Sabado mismo. Widely practiced ni, apan lahi na pod nang dugay gyod kaayo makabayad – basin og nagproblema na gyod sa kwarta ang kompaniya.
Hinaot nga nakatabang kini kaninyo, ug matagaan na mo sa saktong panweldo.
– Atty. Vince
*****
Alang sa inyong mga pangutanang legal, mahimo kamong mo-text sa 0916-664-7624. Sugod karong semanaha, mga pangutana ug tubag nga legal na ang atong i-feature matag Biyernes, Sabado, ug Dominggo ning maong column.