Brigada Balaod 2020.03.01
IYA ANG TITULO
Atty, maayong hapon diha. Pwede ba ko magpatambang nimo? Bahin sa yuts sa akung amahan, kay ang nakabutang didto sa titulo ang akoa ngalan. Naa ba koy katungod ana Atty.
Unya Atty. iya pa gyod giprenda ug gilote-lote. Unya ang mga tawo dili kuno sila mohawa kon papahawon nako sila. Pwede ba ko makapahawa nila tungod kay akoy nakapangalan sa titulo.
– Fred
Dear Fred,
Sa akong sabot sa imong SMS, dili gayod ikaw ang tag-iya sa yuta, sa imo lang kini nakangalan. Kon mao, wala gyod kay katungod sa maong yuta. Gani ang angay mong buhaton mao ang pag-execute og conveyance ngadto sa imong amahan aron ma-rectify to ang iyang mga transaksyon. Kana maong tinarong kun moral nga paagi.
Apan kay nangutana man ka sa puntong legal, kon buot mo gayod, mahimo mong angkonon ang maong yuta, ipa-invalidate ang mga transaksyon sa imong amahan, ug papahawaon ang mga nagpuyo niini. Kini tungod kay ikaw man ang ginganlan nga tag-iya sa yuta. Sa atong balaod, ang ginganlan sa titulo maoy tag-iya, ug iya sa moangkon apan dili maoy ginganlan ang pagprobar nga siya maoy tinuod nga tag-iya. Mahimo kang moduol og abogado aron masugdan ang proseso.
Kining imong problema usa ka ehemplo nga dili tanang legal moral and vice-versa. Bisan legally speaking mahimo nimo ang pag-angkon sa yuta, dili ko mo-advice sa paghimo sa ingon. Kay kon imong hunahunaon, di man gyod na imoha ang yuta, ug immoral ang pagpangangkon og butang dili imoha.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.