Brigada Balaod 202.03.03 (Tuesday)
DILI IULI ANG MGA BATA
Dear Atty.Vince maayong hapon. Tambagi intawon ko ug unsa angayan nakong buhaton nga makuha nako ang akong duha ka anak nga gidiretso og kuha diri nako nga walay pananghid. Ug kon ari na pod kuno sila nako dili sila tagaan og sustento sa ilang amahan kaw bulag nami. Please tabangi intawon ko Atty. Vince. Salamat.
– Rhea
*
Dear Rhea,
Wala nimo giklaro sa imong text kon kasado o dili ba kamo sa amahan sa mga bata nga maoy nagkuha kanila.
Kon kasado kamo, nan ang kustodiya sa mga bata anaa kaninyong duha, ug dili ka makakiha og kidnapping batok sa imong bana. Hinuon makadangop ka sa korte aron i-clarify ang status sa kustodiya sa mga bata. Mahimo usab nga violation sa Republic Act No. 9262 (Anti-Violence Against Women and Their Children kun VAWC) ang imong ipasaka; usa sa pwede nimong pangayoon nga samtang on-going ang kaso temporaryong anha kanimo ang kustodiya sa mga bata.
Kon dili kamo kasado, nan mga illegitimate child ang mga bata. Ubos sa atong balaod, ang mga illegitimate child ubos sa full sole custody sa inahan gawas na lamang kon dunay compelling reason nga dili adto sa inahan ang bata. Apan dili makabuot-buot ang amahan bahin niini; kinahanglang moadto siya sa korte. Kon dili niya iuli ang bata human sa pag-demand nimo nga iuli, mahimo kang mopasaka og kasong kriminal kay Kidnapping na man kini.
In either case, pwede nimong makuha ang mga bata independent kon mohatag ba siya ug sustento og dili. Bisan kon naa kanimo ang mga bata obligado gihapon siya mohatag og sustento. Dili kini niya mapaundang abi lamang nga wala kaniya ang mga bata. Kon dili siya mohatag mahimo kang mokiha og kasong kriminal o sibil.
Ang labing maayo mong buhaton mao ang pagdangot sa Municipal o City Social Welfare Development Office (MSWDO/CSWDO) sa inyong lungsod/dakbayan. May mga children focal sila na maoy mahimong makig-coordinate sa children focal sa MSWDO/CSWDO sa dapit diin nahimutang ang mga bata.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.