Dear Atty. V,
Tawga lang ko sa ngalang James. Usa ko ka trabahante sa usa sa mga pabrika sa Sugbo, ug tungod niining corona virus, mihinay ang among produksyon. Mao kadtong mihimo og mga lakang ang among management. Kadtong mga under probation pa, gipangtangtang nila diretso. Ang kadto usab nga mga regular apan medyo badlongon, ila pong gitangtang, samtang kami nga nahabilin, nag-reduce work. Imbes unom ka adlaw sa semana mi pa-reporton, karon upat na lang ka adlaw.
Ang akong pangutana Attorney, alang usab sa akong mga kaubanan mao kini: (1) Makabayad pa og separation pay ang kompaniya ngadto sa mga nangatangtang nga probationary employee? (2) How about ang kadtong mga regular nga empleyado? (3) May katungod ba kami nga moreklamo nganong upat na lamang kami ka adlaw patrabahoon?
Daghan kaayong salamat.
– James
****
Dear James,
Ubos sa atong balaod, ang separation pay kinahanglan bayaran kon ang pagtangtang sa trabahante ubos sa mga “authorized causes”. Ang mga authorized causes diin kinahanglan bayaran og separation pay ang trabahante mao kining mosunod: introduction of labor-saving devices, redundancy, retrenchment, pagkasakit, ug pagpanira sa negosyo nga dili tungod sa financial losses. Ang posibleng girason nila mao ang retrenchment, kay wala pa may reported nga nasakit sa COVID-19 gikan sa mga pabrika. Busa, obligado nga mohatag og separation pay nga balig usa ka bulan nga sweldo sa matag tuig nga trabaho, ang unom ka bulan o labaw pa ilhong usa ka tuig. Hinuon, sa katong mga probationary employee, basin ang ilang gigamit nga rason mao nga wala gyod sila makapasar sa standards, busa wala silay bayranan sa separation pay.
Hinuon, klaroha nga ang katong mga regular nga employee gitangtang gyod ug dili na makabalik sa trabaho. Kay sa Order No. 209 sa Department of Labor and Employment (DOLE), temporary suspension of employment ra man ang gibutang, buot ipasabot, empleyado pa gihapon sila sa kompaniya ug busa walay separation pay.
Kabahin sa pag-reduce sa oras sa trabaho, gi-authorize kini sa DOLE ubos sa Labor Advisory No. 09, Series of 2020, busa wala kamoy legal basis nga moreklamo.
Hinaot nakatabang kini kaninyo.
– Atty. V
****
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.