Dear Atty. V,
Mangutana lang unta ko about sa nahabilin nga gamay nga kwarta sa among mama. Patay na among mama Atty. bag-o lang. Naa man bahin among mama halin sa yuta. Unya tseke man kinsa may angayan mokobra Atty. Ako diay si Mar, kamagulangan sa walo ka managsoon. Ang ika-2 namo gusto iya kobrahon apan ang uban namong igsoon dili mosugot kay bintahador, unsa may maayo namong buhaton Atty. Maghulat ko sa imong tambag. Daghang salamat.
*****
Dear Mar,
Actually, dili na na ninyo ma-encash ang maong tseke samtang wala pa ma-settle ang estate (katigayonan) sa inyong inahan, ug kay taudtaod man kini nga proseso, basin molapas sa unom ka bulan gikan sa pag-isyu sa tseke og ma-stale check na kini (dili na ma-encash). Ang bili sa maong tseke lakip sa katigayonan sa inyong inahan, nga inyong bahinong mga magsoon, lakip na ang inyong amahan kon buhi pa. Kon napirmahan pa unta sa inyong inahan ang maong tseke, ug duna siyay account sa bangko, basin maka-avail mo sa Section 97 sa National Internal Revenue Code nga mag-allow nga inyong i-withdraw ang sulod sa iyang account bisan patay na ang inyong inahan.
Ang labing praktikal nga solusyon sa inyong problema mao ang pagsurender sa maong tseke ngadto sa nagpalit sa yuta, ug pagpangayo og bag-ong tseke nga naa sa inyong ngalan nga magsoon. Aron way gubot, bahina na lang ninyo daan ang bili sa yuta aron tagsa mog tseke.
Hinaot nakatabang kini kanimo.
– Atty. V
*****
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.