Dear Brigada Balaod,
Tawga lang ko sa ngalang Mylen. Nadasig ko sa pag-text ani nga numero kay nabasahan nako sa Brigada Newspaper nga mohatag kamo og libreng legal advice. Ang ako man god problema, kaning among silingan nga gituok ang akong binuhing itik ug namatay gayod. Buot kong mapriso gyod siya sa iyang gibuhat. Gipatawag na siya sa barangay apan wala gyod mobutho. Naa mi giduol nga abogado apan kami man hinuoy pabayron sa acceptance fee nga P40,000 nga kami man untay mokiha. Asa mi makaduol aron matabangan mi niining among kaso? Salamat.
*****
Dear Mylen,
Salamat sa padayong pag-patronize sa Brigada Newspaper. Kabahin sa imong itik, ang labing tukmang kaso niini mao ang gitawag nga Malicious Mischief diha sa atong mga balaod. Matod pa sa Article 327 sa Revised Penal Code, “Any person who shall deliberately cause to the property of another any damage not falling within the terms of the next preceding chapter, shall be guilty of malicious mischief.” Ang silot sa Malicious Mischief magdepende sa damage; sa imong sitwasyon, masulod na sa arresto menor (1-30 ka adlaw nga pagkapriso) o multa nga dili moubos sa balor sa itik apan dili pod molapas og PHP 40,000.00.
Kon moduol kamo og pribadong abogado aron matabangan, naturalmente obligado mong mobayad sa bayranan ngadto sa abogado. Ang mga pribadong abogado wala may obligasyon nga motabang ninyo nga libre. Gani, bisan dinhi sa Brigada Newspaper, taman ra man sa legal advice ang atong gilibre, isip public service sa atong mga magbabasa. Ang PHP 40,000.00 nga acceptance fee standard usab sa mga sakop sa Integrated Bar of the Philippines (IBP) Cebu Province ug Cebu City chapters.
Sa ako usab nga opinyon, dili kamo mo-qualify sa Public Attorney’s Office (PAO). Apan sulayi lang. Usually ang mga PAO office nato, naa ra pod sa Hall of Justice diin nahimutang ang mga korte.
Kon wala gayod kamoy maduolan nga abogado, mahimo kamong magpatabang og mga law student aron lang mahan-ay ang inyong sumbong. Kon makalusot kini sa piskaliya, didto sa korte naa nay piskal nga sweldado sa gobyerno ug maoy inyong manlalaban.
Hinaot nakatabang kini kanimo, ug hiposa lang pod na ang inyong itik aron dili matuok sa inyong silingan.
– Atty. Vince
*****
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.