Dear Brigada Balaod,
Si Mercedita ko, nagpuyo sa bukiran sa Dakbayan sa Sugbo. Ang akong problema kabahin aning ako apo nga gidapatan sa kapuyo nga German sa akong anak, ang iyang inahan. Tua man god sa gawas ang akong anak, nag-domestic helper. Kaning German duna kuno niy kaso didto sa probinsya nga pagpangulata pod og bata. Unsa may angay nakong buhaton niini? Salamat.
***
Dear Mercedita,
Ang praktikal nga solusyon nimo niini nga mahilayo ang bata sa maong Aleman. Sa sabot nako sa imong mensahe, dili anak sa maong Aleman ang imong apo, sa ato pa, walay katungod ang maong Aleman nga mopaduol sa bata. (Bisan gali kon iya kining anak, mahimong i-restrict o kompletong tangtangon sa korte ang iyang katungod nga moduol sa bata kon mapakita nga abusado siya.)
Kon naa pa sa Pilipinas ang imong anak, mahimo unta siyang mopasaka og protection order ubos sa Republic Act No. 9262. Dili tataw sa atong balaod kon makahimo ba siya pagpasaka niini kon tua siya physically sa laing nasod. (May kaso nga miabot sa Korte Suprema diin ang pagluib sa bana nahitabo samtang didto sa gawas ang asawa, apan dinhi na sa Pilipinas ang asawa pagsang-at sa kaso.)
Ubos sa protection order, naa ang gitawag nga “stay-away” order diin mandoan ang tawo nga mopalayo gikan sa reklamante sa gilay-on nga gisitar sa korte (usually 100 meters). Busa malikayan ang pagpangabuso kay dili na man makaduol sa biktima ang abusado.
Sa sunod nga buhaton kini niya sa imong apo, ayaw pagpamakuli og adto sa Women and Children Protection Desk (WCPD) sa kwerpo sa kapulisan diha sa inyong lugar. Pakorasyoni ang bata sa hinanali. Ipaandam ang kaso aron mapasaka gayod kini sa piskaliya. Gali kon dali kang makaadto sa mga pulis, basin masulod pa sa hot pursuit.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.