Dear Atty. Isles, dugay na ko nimong follower, bisan katong didto pa ka sa laing planeta nagtingogan ug nagsulatan. Gani, naengganyo ko nga moeskwela og abogasiya tungod nimo. Karon 3rd year na ko sa usa sa mga college of law sa Cebu. Ang akong pangutana, Attorney, kabahin niining behavior sa usa sa akong mga professor. Sukad pa gyod pagsugod sa semester niadtong Enero, sa wala pa ang COVID, duna gyod ni siyay special consideration sa akoa. Pananglitan, kon mag-recitation, unya di ko katubag og tarong, dili ra ko niya insultohon. Apan ang ubang classmate nako iyang pakauwawan. Unya bisan dili akoy class president, sa ako gyod siya mo-text sa updates sa klase. Pag-switch na namo og online classes tungod sa COVID, pirme gyod ko niya i-on the spot. Now and then moingon siya, “Naa pa ka diha Marie?”. Niadtong finals week, mi-text siya nako kon pwede ba kuno mi mag-dinner ug kanus-a daw nako siya ipailaila sa akong ginikanan. Ako siyang gitextan nga para sa unsa man nga may uyab na man ko. Wa pod sa ako hunahuna nga ilisan og abogado ang ako uyab nga sekyu kay hapit na man to siya mahimong supervisor. Buot gyod unta ko mokonsulta niini og abogado Attorney kay nahasol gyod ko. Buot nako siyang ikiha og sexual harassment apan naglibog ko og masulod ba gyod to sa balaod nga wala may tataw nga sexual advance. Daghan kaayong salamat, Attorney. Ayaw lang i-publish ang akong number please.
***
Dear Marie,
Sexual harassment gayod ang gihimo sa maong abogado. Sumala sa Section 3(b)(4) sa Republic Act No. 7877, ang Anti-Sexual Harassment Act of 1995, there is sexual harassment “[w]hen the sexual advances result in an intimidating, hostile or offensive environment for the student, trainee or apprentice.” Matod sa Supreme Court sa Domingo v. Rayala, 569 Phil. 423, ug
Bacsin v. Wahiman, 576 Phil. 138, mahimong ma-commit ang sexual harassment bisan kon walay categorical nga demand for sexual favor.
Actually kaning imong sitwasyon susama gyod ni sa In re Atty. Co Untian, A.C. No. 5900, April 10, 2019. Sa maong kaso, magpadalhanan pod og mensahe ang abogado nga maestro ngadto sa estudyante.
Kon nagduda gyod ka kon mosalir ba ang usa ka criminal case, sulayi lang usa ang internal procedure sa imong law school. Bisan kon probably ang molingkod sa Committee on Decorum and Investigation (CODI) mga suod ra pod sa imong maestro, tungod kay substantial evidence ra ang standard of proof didto, mas dako og tsansa nga ma-penalize gyod ang imong professor.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.