Dear Brigada Balaod,
Tawga lang ko nga Jane. Nagpuyo ko sa usa sa mga lungsod sa lalawigan sa Sugbo. Niadtong Marso 28, Attorney, panahon na sa community quarantine, gilili ko sa among silingan samtang naligo ko. Mao tong ako siya gikiha sa barangay, ug pagka Lunes gyod dayon, Marso 30. Atong Mayo 29, nakakuha na kog Certificate to File Action. Giingnan ko sa among kapitan nga angay nakong ipasaka nga kaso ngadto sa piskaliya Unjust Vexation, pero dapat ma-file nako sa wala pa ang Hulyo 26, 2020. Apan Dominggo man na so dapat daw ma-file na gyod na Hulyo 24, 2020, Friday. Ang akong problema, Attorney, kay ang opisina sa provincial prosecutor naa man sa Cebu City ug dili man ko makasulod sa Cebu City kay ECQ pa man sila ug most likely ECQ pa gyapon hangtod Hulyo 31. Unsa may angay nakong buhaton? Sakto ba ang amo kapitan nga sa Hulyo 24 ra taman nako ma-file ug mo-prescribe na? Salamat.
***
Dear Jane,
Depende na sa pagka-interpret sa rules kon Hulyo 24 o 26 ba ang last day of filing sa imong kaso, pero mas maayo nga maniguro og i-file gyod nimo sa Hulyo 24 o mas sayo pa.
Ang Unjust Vexation light felony ra. Ang mga light felony mo-prescribe after two months (sa ato pa, di na ma-prosecute). Gikan Marso 28 ngadto sa 30, kanus-a gi-file nimo ang kaso sa barangay, duha ka adlaw ang nakaon sa 60 ka adlaw. Gikan Marso 30 ngadto Mayo 29, 2020, nag-urong usa ang pagdagan sa prescription kay gihusay pa man mos barangay. Mao ni ang nabutang sa balaod. Gikan Marso 30 ngadto Mayo 29, 2020, 60 ka adlaw, ug matod sa rules mourong usa ang pagdagan sa prescription samtang naa pas barangay, maximum of 60 days. Pagka Mayo 30, gasugod na pod og dagan. Ang ika-58 nga adlaw gikan sa Mayo 29, 2020, Hulyo 26, 2020. (58 na lang ka adlaw imong iphon kay nakagamit kag duha – Marso 28 ug 29.) Tungod kay Dominggo man ang Hulyo 26, 2020, ug sirado ang mga piskal, kinahanglan ma-file kini sa Hulyo 24, 2020.
Sa pagkakaron, mahimong mag-file og reklamo for preliminary investigation online. I-email lang in PDF format ang Investigation Data Form (IDF), complaint affidavit ug attachments ngadto sa oppcebupreliminv@yahoo.com
Ang IDF, complaint affidavit ug affidavit of witnesses mahimong ipanotaryo sa notario publico sa inyong dapit.
Tungod kay i-email ra man, mahimong i-argue nga Hulyo 26 gyod ang deadline, pero nganong samokon pa nimo ang imong kaugalingon. I-file na lang na via email sa Hulyo 24 o mas sayo pa.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.