Dear Atty. V,
Mangutana lang unta ako Atty.. unsay maayong buhaton bahin aning akong gipaabangan nga luna mga tulo ka ektarya sa usa ka magtiayon. Mga 12 na sila ka tuig gaabang ug sa ika-2 nila ka tuig ning hangyo sila nga motanom og saging ug tungod kay kaila kami kaayo ug silingan pa gyod, ningsugot ako nga ila tamnan. By the way Atty. tag 20k ila abang nako kada tuig. Ug ang akong nadawat nga abang pinaagi sa kwarta padala 125,500, dili pod ko mo-deny Atty. nga nakadawat pod ko og abang pinaagi sa tunol-tunol lang pero kada dawat nako aduna koy pirmahan, usahay sa notebook, usahay sa logbook ug usahay anha ra sa gamayng bondpaper. Karon Atty. ning ingon sila nga 220 K na kuno ako na kuha, ug ila iuli nako ang akong luna kon ako iuli kanila ang 220 K nga ako nakuha nila. Ako sila giingnan nga ang paggamit diay ninyo sa akong luna, dili na lang ba to kuwentahon, ato sumadahon. Ming-ingon sila Atty. nga gilungkab kuno sa kawatan ang ilang tindahan ug gidala ang akong gipamimahan nga notebook, logbook ug uban pa. Ako sila giingnan Atty. nga dili ako motuo nga dad-on sa kawatan ang listahan kay dili kadto nila makwarta. Alang-alang ang kawatan maoy maningil ato? Mao ni Atty. ako problema nga ila man akong gibutangbutangan og utang nga abang man ang among sabot, dili prenda. Ika-2 nako nga pangutana Atty. Unsa may mahitabo sa saging nga ila gitanom? Ako diay si Ben Atty. Malooy ka Atty. tambagi intawon ako unsa maayong buhaton. Daghang salamat, God bless.
*****
Dear Ben,
Lahi ang utang, lahi usab ang prenda. Ang prenda (mortgage sa Iningles) utang nga may security; sa panahon nga ang utangan dili makabayad sa utang mahimong i-satisfy ang utang pinaagi sa pagbaligya sa security. Matod sa Article 2125 sa atong Civil Code aron balido ang usa ka mortgage, kinahanglan nga ang dokumento diin kani nasulat ma-rehistro sa Registry of Property (Register of Deeds karon). Kon wala moy kasulatan, nan walay marehistro sa Register of Deeds. Gani bisan pa kon tinuod nga duna kay utang kanila, dili mahimo nga maila ang yuta. Hinuon mahimo nilang iprobar didto sa korte nga may utang ka kanila, ug kon modaog sila ang imong yuta maoy ibaligya sa korte aron mabayran sila.
Sa ikaduha mong pangutana, assuming nga mapa-eject nimo sila, ang maong mga saging maimoha human nimo sila bayri sa necessary and useful expenses. Kini mao ang gasto sa pagpananom ug pagpatubo sa maong mga saging. Samtang di pa nimo sila mabayran, may katungod sila nga magpadayon sa pagpanguha sa bunga sa saging; kon di mo magkasabot pilay saktong abangan adto mo sa korte maghusay.
Hinaot nakatabang kini kanimo.
– Atty. V
**
I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.