Dear Atty. V,
Tawga lang ko sa ngalang Roger. Nagnegosyo ko og mga billboard signs ug duna koy kanhi supplier sa mga materyal apan nanira sila tungod sa COVID. Mao tong nangita ko og laing supplier ug duna koy nakit-an sa Facebook. Nangayo sila og credit line nako sa bangko ug mao tong mikuha ko sa ________.
Ang initial unta nila nga shipment niadtong Lunes apan karon nahuman na lang ang semana wala pa gyod maabot ang ilang produkto. Wala pod silay feedback. Dili na pod ma-contact. Ako na gipa-hold sa bangko ang credit line.
Ang akong pangutana makakiha ba ko nila og estafa sa ilang pag-ilad nako? Duna man koy damage kay mga kliyente man ko nga mo-pull out kay wala ko ka-deliver.
***
Dear Roger,
Ang gravamen sa estafa mao ang pagkausik sa imong kwarta kay giilad ka nga ma-deliver ang usa ka butang. Apan sa imong sitwasyon, wala mausik ang imong kwarta kay napa-hold man nimo ang credit line. Sa ato pa, walay damage kanimo. Dili ka makakiha og estafa.
Ang damage nga imong gipasabot dili mao ang damage nga naa sa atong balaod bahin sa estafa. Hinuon mahimo kang mokaso niya og sibil.
Hinaot nakatabang kini kanimo.
– Atty. V
**
I-text ang inyong mga pangutanang legal sa 0916-664-7624. Walay bayad ang among pagtubag.