Dear Atty. V,
Tawga lang ko sa ngalang Odin. Niadtong Disyembre 2020, Atty. V, gi-share nako ang post sa usa ka media personality sa Cebu (dili taga Brigada News FM) kay kaingnon man nakog tinuod gyod to. Naunsa bang dili man diay to tinuod. Unya ang hingtungdan kay naka-screenshot sa ako pag-share. Karon kay gikiha ko niya sa barangay. Unsa may angay nako buhaton Atty.?
***
Dear Odin,
Mas maayo nga atubangan mo lang kini sa barangay kay basin mahusay kamo didto. Kon gi-share ra gyod nimo, ug wala nimo pun-i pa og bisan unsa, dili libelous ang pag-share sa maong libel. Duna nay statement ang Supreme Court kabahin niini nga sitwasyon.
Hinuon, kon samokan ka nga moatabang pa sa barangay, mahimong dili na ka moatubang didto. Technically, walay jurisdiction ang barangay sa maong kaso kay ang penalty sa Cyber Libel prision mayor minimum ug medium, sa ato pa, usa ka tuig ug usa ka adlaw ngado sa 10 ka tuig nga pagkabilanggo. Ang kinahanglang moagi sa barangay aron husayon kato lamang wala kaabot og usa ka tuig nga pagkabilanggo o multa nga dili molapas og PHP 5,000.00 (Section 408(c), Local Government Code).
Hinaot nakatabang kini kanimo.
– Atty. V
(Note: This was an article for Brigada Balaod, a column I had with the Brigada Newspaper Visayas Edition from September 2019 to August 2022.)