Maayong buntag Attorney. Mangayo unta ko og tambag kabahin sa akong anak. Makapugos ba ko og pangayo sa iya amahan, nga minyo mang dako tong lakiha? Naa pod siyay mga anak sa iyang legal nga asawa. Duha pa ka tuig ang bata. Magsige ra ko og kontak sa iya amahan aron mohatag, apan kon dili ko mokontak dili pod mohatag. Naa man unta siyay maayong trabaho. Unsa may angayan nakong buhaton? Makapangayo ba ko og tabang sa DSWD?
Makapangayo ka og suporta alang sa bata bisan kon kasado ang amahan niini. Basta iyang giila ang bata (mipirma siya sa luyo sa Certificate of Live Birth), obligado siya nga mosuporta. Sa imong estorya, mohatag man tuod ang amahan apan imo pa laging kontakon. Mas maayo ni nga sitwasyon kay klaro nga may pagpakabana pa ang amahan sa iyang anak. Kinahanglan lang gyong kontakon, kay basin sab tingali og naglisod, kay naa na man pod diay siyay lehitimong pamilya. Mahimo kang modangop sa DSWD aron maghimo mog sinulatan ug kasabotan gyod kabahin sa paghatag og sustento. Kining maong kasulatan magamit mong ebidensya batok kaniya kon gikinahanglan gayod nga modangop ka sa korte.Sa kasamtangan, mas maayo nga karon ug unya imo lang gyod siyang pahinumdoman kabahin sa iyang responsibilidad ngadto sa inyong anak.
xxx
Maayong hapon Attorney. Naa koy uyab. Gihigugma kaayo nako siya mao nga dili ko gusto nga biyaan ko niya. Busa nagpakaaron-ingnon ko nga mabdos ko ug siyay amahan. Talilarga siya niadtong panahona padulong sa Kuwait Attorney, ug karon, bali nag ikawalo nga bulan sa ako kunong gisabak. Nahadlok na ko kay nagsige ra ba siyag padala og kwarta para palit og mga galamiton sa bata, unya nagasto na pod nako ang kwarta. Unsay angay nakong buhaton Attorney?
Sultihi siya sa tinuod. Ang imong gibuhat mahimong makonsidera nga usa ka klase sa limbong (gitawag og estafa sa atong balaod). Pangitag paagi nga mauli mo kaniya ang total nga balor sa kwarta nga iyang nahatag kon dili ka buot nga mabilanggo.
xxx
Maayong hapon Attorney. Mangayo lang ko og katin-awan Attorney. Nagtrabaho mi nga commission-based lang, walay allowance, walay libreng pagkaon, unya ubos pa gyod sa minimum ang among sweldo. Apan ang among amo kay kusog kaayo mang-deduct. Kon walay sapatos, deduct. Kon walay medyas, deduct. Hasta kon walay hairnet. Pwerte ra bang dagkoa sa deduction Attorney. Hapit wala na lang mi madawat. Makataronganon ba ni nga ubos man sa minimum ang iyang panweldo namo? Salamat.
Bisan gani kon minimum o labaw sa minimum ang inyong panweldo dili gani na makataronganon. Ang atong balaod hugot nga nagdili sa pag-deduct gikan sa sweldo sa trabahante, gawas na lamang sa balido nga mga rason. Tinuod, pwede mong dili patrabahoon kon wala moy sapatos, medyas o hairnet, kay pagsunod man lang sad kini sa regulasyon nato sa kalimpyo. Iyang risgo nga patrabahoon mo. Apan kanang pag-deduct niya og pwerteng dagkoa nga kantidad nga hapit wala na lang moy madawat dili na makataronganon. Mahimo mong modangop sa labing duol nga buhatan sa Department of Labor and Employment (DOLE) aron matabangan mo.