Katong mga nangutana kanato pinaagi sa pag-text sa 0916-664-7624 mopasalamat gayod nga natubag ang ilang pangutana nga wala sila makabayad og abogado. (Dili hinuon tanan matubag gyod nato sa hingpit kay naa may mga pangutana nga gikinahanglan gyod tan-awon ang dokumento sama sa titulo sa yuta.) Dili gyod ikalimod karon nga medyo dako-dako pod ang bayad sa mga abogado. Kini tungod sa hataas usab nga panahon sa pagtuon, kay gikinahanglan pa man mohuman og usa ka degree sa dili pa makapadayon sa law school. Unya, bisag abogado na, magsige lang gihapog tuon. Gani, sa atong practice nga dili gyod ingon ana kadako sa ubang abogado, dili malikayan nga magabhian gayod sa opisina sa pagtrabaho.
Niadtong miaging tuig, mipagawas ang Integrated Bar of the Philippines (IBP, ang among organisasyon sa mga abogado) Cebu City ug Cebu Province chapters og hiniusang taripa alang professional services sa mga abogado. Mao kini ang nasabotan:
Pagnotaryo – kon simple lang nga dokumento, P300. Mga kontrata – P1,500. Pag-andam sa kontrata (ang pag-type gyod sa kasabotan) – 2% sa contract price, o P1,500.
Pagdawat og kaso (acceptance fee) – sa mga kasong kriminal, P40,000 kon sa Municipal Trial Court (MTC), P65,000 sa Regional Trial Court (RTC), P80,000 sa Court of Appeals (CA), ug P150,000 sa Supreme Court (SC). Sa mga kasong sibil – P35,000 sa MTC, P60,000 sa RTC, P75,000 sa CA, ug P150,000 sa SC.
Pagkoreher sa Certificate of Live Birth – P35,000; adoption kon pulos Pilipino – P70,000; adoption kun foreigner – P150,000; naturalization – P120,000; election cases – P120,000; testate/intestate proceedings – P60,000 o 5% sa fair market value (FMV) sa estado, mosaka ngadto sa P150,000 o 10% kon dunay opposition; pagpatitulo sa yuta – P150,000 o 5% sa FMV.
Gawas sa acceptance fee, mobayad usab sa matag adto sa korte (appearance fees): P2,000 o P1,000/oras sa MTC; P3,500 o P1,500/oras sa RTC; P8,000 o P2,000/oras sa CA; P15,000 o P2,500/hr sa SC. Sa Labor Arbiter, P2,000 o 1,000/oras; sa Department of Labor and Employment (DOLE), Philippine Overseas Employment Administration (POEA), ug National Conciliation and Mediation Board (NCMB) – P2,500 o P1,500/oras; sa National Labor Relations Commission (NLRC) – P3,000 o P1,500/oras; Ombudsman – P2,500 o P1,000/oras; sa prosecutor’s office – P2,500 o P1,000/oras; sa regional state prosecutor (RSP) – P3,500 o P1,500/oras; sa uban pang mga opisina, P3,500 o P1,500/oras.
Kini maoy mga minimum nga bayranan; pwede mas mahal pa ani ang iingon sa abogado.
Matod pa sa maong resolution: “A member who stubbornly refuses to follow the foregoing standard fee schedule shall be reported to the IBP National Office for appropriate disciplinary action.” (Item No. 6, Point VII)