Wala lang damha, miabot na man diay og usa ka bulan ang akong pagkakolumnista dinhi sa Brigada Newspaper.
Dako kong pasalamat sa management sa Brigada News FM ug sa Brigada Newspaper, labi na gayod ni Raul Del Prado ug Melbert Munsad.
Sa miaging 30 ka adlaw, nakapatik kita og unom ka artikulo bahin sa Criminal Law, tulo sa Election Law, upat sa Civil Law, lima sa Commercial Law, ug 12 sa uban pang kategoriya.
Gikalipay ko usab ang padayong pagpadangat sa mga pangutana pinaagi sa atong cellphone number 0916-664-7624. As much as possible, atong tubagon gilayon, apan usahay inigkagabii na matubag kay na-busy kita sa atong bupete kun law firm.
Ang dili ko makalimtan nga mga pangutana, ug nga ubay-ubay pod diay ang naa sa maong sitwasyon, kining kabahin sa nanagpuyo diin ang babaye minyo sa lain ug sila sa iyang bag-ong kapuyo nakaanak na usab. Daw mahulagway ko ang dagway sa nag-text dihang ako gipasabot nga ubos sa atong balaod, ang anak sa babayeng minyo iya sa iyang bana, gawas na lamang og kwestyonon sa bana – sulod sa usa ka tuig kon naa ra sa samang lungsod o dakbayan ang bana, o duha ka tuig kon wala sa samang lungsod o dakbayan apan anaa ra sa Pilipinas, o tulo ka tuig kon ang bana tua sa gawas sa nasod.
Ato usab gipaninguha nga ang matag artikulo nato relevant ug may kalabotan sa kasamtangang mga panghitabo. Maong ato i-focus usahay nganha sa mga newsworthy items, sama sa Marcos electoral protest ug Enrile plunder update.
Kini ang una natong lindog nga inadlaw. Sa una man god, magsulatan ko sa usa ka magasin nga matag semana ra mogawas. Ug diha pod toy panahon nga nag-ghostwrite ko para sa usa ka public figure, katulo matag semana mogawas ang iyang lindog. Apan basta batasanon lang gyod, madala ra man diay ang pagpreparar og inadlaw nga kolum.
Akong kalipay nga inyong padayong sundon kining atong kolum samtang tagaan pa tag tsansa sa pamunoan sa Brigada Mass Media nga mopaambit sa atong ginagmayng kahibalo.