Dear Brigada Balaod,
Si Lyn ni sa Pardo. Mangutana unta ko. May depression ang ako inahan. Gusto unta ko nga patambalan siya, ipa-psychiatrist ba. Ang problema lang kay dili mosugot ang akong manghod patambalan ang among inahan. May katungod ba ko kay ako ang kamaguwangan sa tanan ako modesisyon para matambalan nako ako Mama Atty. bisan supak ang usa nako ka igsoon.
***
Dear Lyn,
Sa atong sistema sa balaod, ang mga desisyon kalabot sa kahimsog sa panglawas sa usa ka tawo iya sa maong tawo. Kini naglakip sa mga problema sa pangutok sama sa depresyon.
May pipila lamang ka higayon nga pwede ang laing tawo ang mohimo sa desisyon ug dili ang tawo mismo. Ang mga pananglitan niini mao kadtong mentally incapacitated na gyod ang tawo nga mohimo sa desisyon – nabuang na, o unconscious, o legally incapacitated (menor de edad).
Wala matataw sa imohang SMS nga mentally incapacitated na gyod ang inyong inahan. Sa ato pa, naa pa sa iyaha ang katungod nga mohimo sa desisyon.
Kon mentally incapacitated siya, ang iyang bana ang magbuot. Sa imong text, wa ka maghisgot og bana sa imong inahan, so I would assume nga wala na siyay bana. Ning maong sitwasyon lamang makahimo ka desisyon, apan kay may usa man ka ka igsoon nga supak sa imong desisyon, gikinahanglan kang modangop sa korte aron mangayo og katungod nga ikaw ang legal guardian sa inyong inahan. Dili automatic sa balaod nga ang kamagulangang anak ang legal guardian sa mentally incapacitated parent.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.