Dear Brigada Balaod,
Tawga lang ko nga Marriet, minyo, may tulo ka anak ug nagtrabaho sa usa ka pribadong kompaniya. Ang akong problema Attorney, kining akong bana nga hilabihan kadukiruk. Bisag kinsa lang nga babaye ang patolan. Makauban niya sa trabaho, among silingan, hasta pang ako ig-agaw igtagsa. Ambot ba sab mga bayhana nga mahaylo man pod mokuyog niya ngadto sa motel nga minyo man unta siya.
Ang gusto unta nako, Attorney, naay usa aning mga bayhana nga masampolan. Patagmon nakog kaso ba. Aron ang uban di na mosunod. Ang akong problema Attorney, matod sa akong giduol nga higala, kinahanglan gyod kuno apilon ang akong bana. Pero di man ko ganahan maapil sa kaso ang akong bana Attorney. Unsa may akong buhaton niini?
Salamat kaayo.
– Marriet
**
Dear Marriet,
Ang pakighilawas sa usa ka babaye sa lalaking minyo sa eskandalosong paagi usa ka krimen nga gitawag og Concubinage. Wala nimo kini hisgoti nga naeskandalo ang publiko although, understandably, naglagot ka. Sa ato pa, morag dili mo-prosper ang Concubinage. Ang maong kaso nag-require usab nga ang duha gayod ikiha; dili lang ang kabit o ang bana. Usa pa, wala may pagkabilanggo ang babaye sa Concubinage. Palayason lamang gikan sa lungsod.
Hinuon mahimong kalapasan sa Republic Act No. 9262, ang Anti-Violence Against Women and Their Children Act. Mahimong i-consider nga dunay conspiracy. Sa ato pa maapil ang babaye, apan makasohan gyod ang imong bana.
Ang laing option nimo mao ang civil case nga alienation of affection. Mahimo kining batok sa babaye lamang, apan usa lamang kini nga civil case, sa ato pa walay pagkabilanggo.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.