Dear Brigada Balaod,
Pwede ko mangutana? Kanang duha ka managtiayon ba kasado sila dayon nabuwag sila wala nagkasinabot nangita sila ug lain sa usag-usa unya ang lalaki kauban nako sa trabaho. Unsa kunoy iyang buhaton para dili na siya samokon sa babaye Attorney? Unya ako sad Attorney kasado mi sa akong bana naa na mi tagsa-tagsa ka pamilya pero wala mi anak sa akong bana. Pwede pa kaha ko makasal og usab Attorney kay sa huwes ra man mi nagpakasal. Si Ann diay ni Attorney. Salamat.
*
Dear Ann,
Sa atong sistema sa balaod, ang kaminyoon usa ka espesyal nga kontrata nga may interes ang Estado. Mao nga dili kita makadali-dali pagbiya niini ug ang iyang mga epekto gimbut-an sa balaod.
Sa una nimong pangutana, aron dili na siya masamok sa iyang asawa, kinahanglan mo-file siya og annulment sa ilang kasal. Ipa-assess og abogado ang iyang sitwasyon, apan basin psychological incapacity ubos sa Article 36 sa Family Code ang bugtong basehan sa annulment. Ang petisyon moagi sa korte ug taudtaod pa ang resulta.
Sa ikaduha mong pangutana, nga ang imong unang kasal sa huwes lamang, wala magpasabot nga inbalido na kadto. Mao gihapon, ipa-assess ang imong sitwasyon. Basin dunay laing rason aron madeklara nga void ang inyong kasal.
By the way, kanang imong mga anak sa ikaduha mong kapuyo, sa mata sa balaod anak sa imong bana. Maong mas angay gayod nga husayon na ninyo ang inyong sitwasyon.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.