Dear Brigada Balaod,
Buot lang ko masayod unsa ka tinuod nga mahimo nang mabilanggo ang kadtong nagbaligya og motor apan wala mo-report dayon sa maong pagbaligya ngadto sa Land Transportation Office. Kon mao man gali, pila man pod ka tuig ang pagkabilanggo ug unsa may proseso sa paghibawo sa LTO? Salamat.
– Roger
***
Dear Roger,
Tinuod nga ubos sa Motorcycle Crime Prevention Act (Republic Act No. 11235, Section 4), gikihanglan na nga ipahibalo mo sa LTO sa labing dali nga panahon ang pagbaligya mo sa motorsiklo. Ang balaod mismo wala mag-ingon pila ka adlaw gikinahanglan nimo i-report ang pagbaligya, apan ang implementing rules and regulations (IRR) sa maong balaod nag-ingon nga sulod sa tulo ka adlaw gikan sa pagnotaryo sa Deed of Sale.
Ang paagi sa pag-report mao ang pag-adto sa LTO office diin narehistro ang motor (makita na sa Certificate of Registration) ug pagbilin og kopya sa Deed of Sale. Dalha usab ang orihinal kay ikompara kini nila. Patataki ang orihinal nga Deed of Sale nga nadawat kini sa LTO.
Ang maong balaod napalabang last year pa, apan ang IRR nadawat lamang sa U.P. Law Center niadtong Mayo 19, 2020. Kon wala ako masayop, epektibo na ang maong balaod sukad niadtong Hunyo 6.
Ang maong seksyon sa balaod naghimo usab nga krimen sa paggamit sa motor nga wala sa imong ngalan marehistro gawas na lamang kon dunay pagtugot sa tag-iya. Kini mahimo pinaagi sa usa ka sertipikasyon sa pagtugot nga nagngalan sa mahimong mogamit sa motor.
Ang violation sa Section 4 may pagkapriso nga usa ka bulan ug usa ka adlaw ngadto sa unom ka tuig ug multa nga 20 ngadto sa 50 mil.
Hinaot nakatabang kini kanimo.
– Atty. Vince
***
I-text ang inyong mga pangutana sa 0916-664-7624. Ang mga text nga gisulat ginamit ang saktong spelling prayoridad nga tubagon dinhi sa atong lindog.