Dear Atty. V,
Tawga lang ko sa ngalan nga Lino. Duna koy problema Atty. bahin sa akong yuta. Duha ka ektarya nga ako gipa-arendohan og tag otso mil kada tuig. Ang tuyo sa nag-arendo nga mag-uling ra siya, ug ning-due na siya karong tuiga nga ika-8 na niya ka tuig. Gapahimo siya Og balay nga walay pananghid nako, Atty. Iya pod gihimo nga estakanan og mga kahoy o lumber kay ga-negosyo man pod ni siya og lumber. Karon ako gusto nga dili na niya gamiton ako area kay na due na man siya sa iyang pag-abang ug gusto pod ko nga iya ipaguba ang iyang balay kay wala man siya mananghid nako nga maghimo siya og balay. Unsa ako maayong buhaton, Atty.? Gaplano unta ko nga ako siya ipatawag sa barangay. Daghang salamat. God bless.
*****
Dear Lino,
Isip tag-iya sa yuta, makabuot ka unsaon kini paggamit. Usa kini sa mga aspeto sa imong pagpanag-iya.
Kay nahuman na man ang inyong sabot sa iyang pag-arendo o pag-abang sa yuta, nga magpabilin siya niini unlawful detainer na. Busa mahimo mo siyang mapapahawa.
Ang angay mong buhaton, sulatan mo siya og pormal nga demand sa pagbiya. Unya kon dili siya mobiya, moadto ka sa barangay ug ipatawag siya. Kon dili mo ma-settle didto, duol og abogado aron maka-file ka og ejectment.
Inigkahuman sa kaso, obligado siya nga mobayad og abang kanimo niadtong mga panahon nga wala siya kabayad, pero mao ra na ang extent sa imong damages.
Kanang balay nga iyang gitukod, kon dili niya gub-on, mahimo nimong gub-on ug siyay pabayron sa gasto nimo sa pagpaguba. Kini tungod kay builder in bad faith siya.
Dalia na og trabaho kay kon dili kana titled land, human sa 30 ka tuig nga wala siya mag-abang kanimo, maiya na kana.
Hinaot nakatabang kini kanimo.
– Atty. V
*****
I-text ang inyong mga pangutanang legal sa 0916-664-7624. Ang mga text nga may saktong spelling prayoridad nga atong tubagon dinhi sa atong lindog.