Dear Atty. V,
Tawga lang kong Maria. Ang akong bana napriso Atty. pero nakakuha ang Public Attorney og Order of Release. Apan miabot na lang og tulo ka bulan Atty. wala pa gyod ma-release ang akong bana. Ang katarongan sa warden kay wala pa kuno mahuman ang iyang serbisyo. Apan sa Order of Release time served na siya. Ako giingnan ang PAO nga mag-file mi og motion nasuko man nuon unya mi-withdraw sa kaso. Karon Atty. dili man mi ka-afford og private lawyer. Ang ako unta pangutana mahimo diay makabuot ang warden nga dili pa time served bisan miingon na ang korte nga time served? Salamat.
*****
Dear Maria,
Kon miingon ang korte nga time served, unya tan-aw sa warden sayop kini, ang angay niyang buhaton mao ang pag-file og motion for reconsideration sa maong order, whether kinaugalingon niya o pinaagi sa fiscal. Kon milapas na sa 15 ka adlaw sukad sa pagkadawat niya final and executory na ang maong order og dili niya mahimong mapugngan ang paggawas sa piniriso kay dili pa kuno time served para sa maong kaso.
Ang akong sugyot, sutaa kon mao ra ba gyod nga kaso ang hinungdan nga napriso ang imong bana. Kon mao ra gyod, mahimo kang mangayo og writ of habeas corpus gikan gihapon sa korte nga nag-issue sa order of release. Mahimo kang modangop sa Integrated Bar of the Philippines kay gi-disqualify na man diay ka sa PAO.
Hinaot nakatabang kini kanimo.
– Atty. V
(Kining maong artikulo namantala sa Brigada Newspaper Visayas Edition niadtong Enero 9, 2021.)