Dear Atty. V,
Ako diay si Manuel.
Nanghinaot lang ko nga basi matubag nimo kining akong pangutana kay wala gyod koy ikabayad og abogado.
Gani kining akong problema tungod sa akong pagduol kang Atty. _______________ aron magpatabang unta ko sa pagpabalik sa yuta namong magtiayon nga giokuparan sa laing tawo.
Nagpinirmahay mi og kontrata Atty. V nga mobayad ko og PHP 30,000.00 isip acceptance fee niadtong Nobiyembre 30, 2020.
Apan kay kinahanglan pa man diay moagi sa barangay ang maong kaso, maong iya ko gipaadto sa barangay.
Apan nagkasabot man mi didto sa barangay Atty. V nga mopahawa ang nag-okupar sa among yuta duha ka bulan gikan sa among pag-abot didto sa barangay, sa ato pa karong Enero 15, 2021, kay Nobiyembre 15 man mi nag-abot didto sa barangay.
Niadto lang gyong Lunes, Enero 4, 2021, giadto mi sa balay sa nag-okupar sa among yuta kanhi og giingnan nga ila na naguba ang barung-barong nga ilang gitarok sa yuta, ug nga ang mga nahabilin nga mga materyales pwede namo gamiton o sunogon pero dili na lang nila i-pull out kay dako na kaayo silag gasto.
Ato lang gyod Miyerkules Atty., nakadawat ko og demand letter gikan ni Atty. ________________ nga pabayron ko sa PHP 30,000.00.
Duna ba koy obligasyon mobayad sa PHP 30,000.00 Atty.?
– Manuel
*****
Dear Manuel,
Kining imong sitwasyon susama gayod sa nahitabo sa Reyes Cristobal v. Ocson, G.R. No. 19205, February 13, 1923. Sa maong kaso, si Atty. Reyes Cristobal may kontrata ni Ocson aron siya maoy mangabogar sa pag-partition sa yuta sa ginikanan sa naulahi. Ang ilang sabot mao nga si Atty. Reyes Cristobal makadawat og 10 por syento sa bahin ni Mr. Ocson sa kabtangan sa iyang ginikanan. Apan mga duha o tulo ka adlaw human sa ilang written agreement, mikuha og laing abogado si Mr. Ocson. Busa mikiha si Atty. Reyes Cristobal aron mabayran sumala sa kontrata. Ang trial court mihatag og balor sa madawat ni Mr. Ocson gikan sa kabtangan sa iyang ginikanan sa kantidad nga P65,000 (1923 pa ni nga kaso), ug busa P6,500 alang kang Atty. Reyes Cristobal.
Apan ang Supreme Court miingon nga walay basis ang maong award. Nga sa mga sitwasyon nga sama niini (dunay kasabotan apan wala madayon, sa unsa mang rason) bisan pa og naay kasulatan taliwala sa abogado ug sa kliyente, ang makuha sa abogado dili sumala sa naa sa kontrata, apan kon unsay reasonable compensation sa iyang nahimo na. Mao ni ang gitawag nga quantum meruit sa atong balaod. (Lahi ang rule kon nahuman na gyod ang tanang trabaho, diin ang abogado entitled sa unsay naa sa kontrata, gawas na lamang kon unconscionable kini o labihan ra pod.)
Sa ato pa, dili ka obligado mobayad sa PHP 30,000.00. Apan duna gihapon kay obligasyon, depende unsa nay nahimo ni Atty. ___________. Pananglitan, kon naka-research na siya bahin sa actual nga sitwasyon sa yuta.
Gani, sa Flora v. Atty. Giovanni A. Luna, A.C. No. 11486, October 17, 2018, si Atty. Luna gipauli sa tibuok PHP 43,500.00 nga iyang nadawat gikan ni Ms. Flora kay na-settle ang kaso diha pa lamang sa barangay.
Hinaot nakatabang kini kanimo.
– Atty. V
(Kining maong artikulo namantala sa Brigada Newspaper Visayas Edition niadtong Enero 10, 2021.)