Good PM Attorney. Naa unta ko pangutana usab sa imo Attorney kabahin gihapon sa kustodiya sa bata. Ako anak pito ka tuig na, unya naa sa iya inahan. Kon mapasaka nako ang kaso sa korte puyde na ba makapili ang bata kon asa siya mokuyog? Salamat.
Matod sa Artikulo 213 sa atong Family Code, sa sitwasyon nga magbulag ang mga ginikanan, ang katungod sa pagka ginikanan (lakip na ang kustodiya) adto sa ginikanan nga giila sa hukmanan. Ang hukmanan gimandoan nga suhiron ang tanang may labot nga konsiderasyon, labi na ang ginikanan nga gipili sa bata, gawas na lamang kon ang gipili sa bata dili angayang hatagan sa kustodiya. Hinuon, angay timan-an nga ang balaod wala mag-ingon nga tumanon gayod sa korte unsay gibungat sa bata. Igo na nga tagaan kini sa korte og gibug-aton. Busa bisan pag moingon ang bata nga buot niyang mokuyog sa imo, kon makit-an sa korte nga dili kini angay tumanon, mahimong dili ihatag kanimo ang kustodiya.
xxx
Attorney maayong hapon. Si Riza ko, 20 anyos. Di pa ko katrabaho kay nagpasuso ko sa akong puya, mag-usa pa lamang ka tuig. Di mi kasado sa iyang amahan, apan nagsustento siya balig 3,000 pesos matag bulan. Baynte mil ang iyang binulang sweldo. Karon mi-abroad siya. Puyde ba ko makapangayo og dugang sustento? Salamat.
Wala nimo klaroha sa imong text kon giila ba (gi-acknowledge) sa iyang amahan ang bata. Mao man god nay importante gyod basta anak sa gawas sa kaminyoon. Kay kon wala niya gi-acknowledge, mahimo ganing putlon niya ang 3,000 pesos matag bulan nga sustento (nga kulang ra usab kaayo alang sa usa ka bata). Apan kon iyang giila ang bata nga iyang anak, mahimo kaayo nga mangayo ka og dugang sustento, proporsyonal lang tingali sa porsento nga gihatag sa bata sa dihang diri pa sa Pilipinas ang amahan.
xxx
Atty., kinahanglan ba gyod mokuha og abogado aron makakiha mi?
Depende. Kon sibil ang kaso, gikinahanglan gyod mo og abogado nga pribado. Kon kriminal, ang publikong prosekyutor maoy mohupot sa kaso batok sa reklamante (nga mao gayod ang estado), samtang ang Public Attorney’s Office (PAO) ang mohupot sa habig sa akusado kon ang akusado dili makabayad og pribadong abogado. Kon makagasto kamo, mas maayo gayod nga mokuha og pribadong abogado. Tinuod mga banggiitan ang sagad sa mga prosekyutor ug mga abogado sa PAO, apan porbidang daghanang kaso ana nila nga gihuptan, busa dili gyod mo kaseguro nga matutokan ang inyong kaso.
xxx
Maayong hapon, Sir Vince. Mahimo ba nga magbulag ang akong mga ginikanan nga among pagbuot nga ilang mga anak, kay samok kaayo sila sigeg lalis god. Banha kaayo, di mi kasabot nila.
Ang kontrata sa kaminyoon usa ka espesyal nga kontrata, nga may dakong papel ang estado. Dili kini basta-basta maungkag ug mabulag ang mga partido. Bisan pa gani og gusto sa magtiayon nga magbulag sila sa maayong kabubut-on, kasado gihapon sila ubos sa balaod. Samot na nga kamong mga anak ang gusto nga magbulag sila.
xxx
Maayong hapon, Atty. Mangutana lang ko kon pila ang minimum nga panweldo karon. Salamat.
Ang minimum nga sweldo magdepende kon diin ka nagtrabaho ug unsay linya sa imong gitrabahoan. Ang labing maayong buhaton aron masuta ang actual nga minimum mao ang pag-Google sa website sa Regional Tripartite and Wage Productivity Board sa imo rehiyon ug tan-awa pila ang angay unta ihatag kanimo.